Apnon Se Dur Sapnon Ke Paas – Pardesiyon Ki Kahani

Radhe Radhe doston!

Rakhi ki Diary mein aapka swagat hai!

Aaj main lekar jaungi aapko ek ese safar    per jisme sapno ko poora karne ka jazba   hai or apno se door hone ka dard.

Kabhi kabhi sapne humein un raahon par   le jaate hain, jahan dil nahi jana chahta.  par  manzil hoti hai. Apne desh se dur   apne  logo se dur — sirf ek khwaab ke peeche chalna padta hai. Yeh kahaani un sabhi logon ki hai jo apni zindagi mein kuch banane ke liye apni mitti chhod aaye hain — par har raat usi mitti ki khushboo mehsoos karte hain.

Dooriyon ka dard, sapnon ka jazba-

Nayi jagah, naye log, naye tareeke — sab kuch naya hota hai. Pehli baar jab akele airport se nikle the, dil mein umang thi, par aankhon mein halke se aansu bhi. Sapne bade the, par dil chhoti chhoti baton mein ulajh gaya tha — maa ke hath ka khana, papa ki daant bhari chinta, behan ke saath  ki ladai, doston ke saath ki woh masti... sab kuch ek pal mein peeche reh gaya.

Par fir yaad aaya — kyun aaye the? Ek behtar kal ke liye. Apne liye. Apno ke liye.

Naya sheher, par purani yaadein-

Jis sheher mein subah ki chai coffee machine se nikalti ho, jahan log dil se nahi system se jeete ho, wahan apni yaadon ka ek chhota sa kone banana padta hai. Ek purani diary, ek maa ki awaaz record mein, ek video call jis mein ghar ki roshni milti hai.

Ghar se dur rehkar hi pata chalta hai ki ghar sirf ek makan nahi, ek mandir hota hai — ek aisa ehsaas jo har roz dil ke sabse kareeb rehta hai.

Tanhaai se dosti karni padti hai-

Kai baar jab weekend par sab busy hote hain, aur tumhare paas sirf ek cup coffee aur ek khali kamra hota hai — tab tanhaai se baatein karni padti hai. Aur tanhaai bhi kuch na kuch sikha jaati hai — khud se pyar, aur sabr,

Akele rehkar hi apni asli pehchaan milti hai. Jab har kaam khud karna padta hai, tab samajh aata hai ki maa ka pyaar kitna gahra tha, papa ki baatein kitni sachchi thi.

Ghar wapas jaane ki chahat-

Har tyohar, har janmdin, har family function par dil karta hai bas ek baar wapas chala jaayein. Ek baar maa ko bina kisi screen ke dekhein. Ek baar woh galiyon mein phir se ghoomen jahan bachpan chhod aaye the.

Par jab tak wapas nahi jaa sakte, tab tak yaadon se hi rishtey jod kar rakhne padte hain. Ek photo, ek chitti, ek message — yahi to pul banate hain apnon tak pahuchne ka.

Apno se door, sapne ke paas-

Zindagi ne ek aisa mod diya jahan khushi aur udaasi dono saath chalte hain. Sapne bhi hain, aur tyag bhi. Par har din ek nayi umeed hoti hai — ki ek din yeh safar poora hoga. Ki ek din apno ke saamne khade hokar kahenge — "Maine kar dikhaya."

Apno se door rehna asaan nahi hota, par sapnon ke paas pahuchne ke liye kabhi kabhi raaste akelay tay karne padte hain.

Ghar se door rehkar jeena koi aasaan baat nahi hoti. Har roz naya lagta hai, har chehra ajnabee sa, har muskurahat ke peeche ek thakaan chhupi hoti hai.                            

Shuru ke kuch din naye sheher ka jadoo hota hai… naye log, naye raaste, naye sapne. Lekin dheere dheere woh jadoo bhi utar  jata hai… aur tab yaad aata hai ghar.

Raat ke khaali kamre mein jab neend nahi aati, to yaad aati hai maa ki lori, papa ki daant jisme pyaar chhupa hota tha, aur bhai-behen ki woh laadai jisme gehra rishta hota tha. Tab samajh mein aata hai ki “ghar” ek jagah nahi hota… woh logo se hota hain.

Har kamyabi ki keemat hoti hai -

Bade sapne dekhna buri baat nahi hai, lekin unke liye jab apno se door jaate hain, tab samajh aata hai ki har kaamyabi ki keemat hoti hai. Kabhi kabhi woh keemat hoti hai maa ke haath ka bana garam khana, ya shaam ko terrace par doston ke saath gupshup. Aur tab lagta hai ki kaash ek pal ko hi sahi, sab kuch pause ho jaaye aur hum wapas apni purani duniya mein laut jaayein.

Magar zindagi ka yeh hi sach hai—jo sapne hum aankhon mein le kar nikalte hain, woh kabhi kabhi humari ragon mein tanhaayi ban kar utar jaate hain.

Lekin yeh bhi sach hai ki har safar humein kuch naya sikhata hai. Ghar se door jaa kar hum sirf duniya nahi dekhte, hum apne aap se milte hain. Pehli baar sab kuch khud karna padta hai—subah ka alarm sunna bhi, raat ko thakaan ke baad khud ke liye khana banana bhi. Aur jab hum apni hi kaabiliyat pe bharosa karna seekh jaate hain, to wahi tanhaayi humari taqat ban jaati hai.

Aise palon mein yaadon ka sahara sabse bada saathi hota hai. Ek chhoti si photo, ek voice note, ya maa ki likhi ek chitti bhi itna sukoon deti hai ki saari duniya ka shor chup lagne lagta hai. Apne bachpan ke din yaad aate hain, jab zindagi sirf ek chocolate se khush ho jaati thi… aur ab, itni badi duniya mein sab kuch paakar bhi, dil kabhi kabhi ek chhoti si muskurahat ko taras jaata hai.

Par jo log apnon se door hain, unki himmat sabse badi hoti hai. Kyunki har din woh apne dil ke ek tukde ko peeche chhod kar jeete hain. Har roz ek nayi duniya mein apni jagah banate hain, bina kisi shikayat ke.

Agar aap bhi unmein se hain—jo apne ghar, parivaar, doston se door hain, sirf apne sapno ke liye—to bas itna yaad rakhiye, aap akela nahi hai. Har ek aansu, har ek muskurahat, har ek yaad mein hum sab ek jaise hi hain. Aur jab kabhi mann udaas ho, to apne sapnon ki wajah yaad kar lena… wahi wajah jo aapko itni door le aayi hai.

Duriyon se milti hai nayi pahchan -

Kabhi kabhi yeh dooriyan hummein ek nayi pehchaan de deti hain. Jo log ghar ke comfort zone mein rehte hain, unhe shayad kabhi pata hi nahi chalta ki asli zindagi kya hoti hai. Lekin aap jaante ho, kyunki aapne har cheez khud jaani, samjhi, jee hai.

To agar kabhi aapko lage ki sab kuch chhod kar wapas chale jaayein, to ek baar rukiye… ek pal ko sochiye… aur uss pal ko mehsoos kijiye, jab aapne yah safar shuru kiya tha.  Us junoon ko yaad kijiye, jisne aapko ghar  se nikalne par majboor kiya tha. Aur usi junoon se ek baar phir muskuraiye.

Ghar wapas aana bhi ek safar hoga… lekin uss din jab aap apni kamyabi lekar lautenge, to har aankh mein fakhar hoga, har baat mein garv

Jo log abhi videsh mein hain, ya kisi aur sheher mein — unke liye sirf ek hi paighaam:

“Apne sapnon ko sambhaliye, aur yaadon ko dil se lagaiye — yeh safar ek din manzil tak jarur pahunchega.” 💫

Ek pyari si shayari pardesiyon ke naam-

✈️ Apnon se door, sapnon ke paas...             Dil hai udaas, or aankhon mein pyaas.

Har mod pe tanha sa lagta hai raasta,          Par sapno ka junoon kabhi rukta nahi zara sa.

Ghar ki yaadon ka bojh hai man par,          muskaan hai chehre par, or sapne ankho    ke andher.

Mitti ki khushboo ab bhi dil mein basi hai,    naye sheher ki har gali ab apni si lagi hai.

 Ek call maa ka, ek chitti purani,                 Ban jaati hai roshni, jab lagti hai zindagi   veerani.

Jo chhod aaye pichhe... woh pal, woh log,    Woh hi to bante hain har din ka sabse    gehra jog.

Lautne ki khwahish, rukne ka iraada,        Yahi to hai ek pardesi ki  zindagi ka    fasaana.

Sapne bade hain, par dil chhoti chhoti baaton se hi jeeta jaata hai."

Jab hum apno se door hote hain, to zindagi ek alag hi imtihaan leti hai. Har muskurahat ke peechhe thodi thakan hoti hai, aur har success ke peechhe kisi apne ki yaad. Isliye meri salah yahi hai —

☘️Meri Salah:

🧳 Sapne zaroor poore karo, lekin apne rishtey kabhi adhure mat chhodo.

Har phone call, har video call, har chhoti si baat ek nayi taazgi laa sakti hai. Har hafte maa ko ek chhota sa message bhejna, papa se haal poochhna, bhai-behen ke sath ek chhoti si hasi-mazaak bhi woh connection banaye rakhte hain jo doori ke baad bhi dil ko paas banaye rakhta hai.

📅 Routine mein ek 'Apno ke liye waqt' rakhna shamil karo.

Jitna hum meetings, goals, aur deadlines mein jee rahe hain, utna hi zaruri hai ki hum kisi ek din sirf apne logon ke liye jeeyein. Ek purani photo dekh lena, ek diary likhna, ya ek letter bhejna — yeh chhoti baatein andar ki khaali jagah bhar deti hain.

💡 Aur sabse zaruri — jab kabhi dil thak jaaye, toh yaad rakhna:

tum sirf sapne poora karne nahi aaye ho, tum apne logon ke liye bhi ek misaal banne aaye ho.                                                 Unki duaon mein jo taqat hai, usse bada koi motivation nahi.

💕Kya aapne bhi kabhi sapnon ke liye apno se doori jheli hai? 💭 Apna dil ka haal comments mein zarur likhiye — shayad aapki kahani kisi aur ko hausla de de. 

Dhanyawad!

Radhe Radhe!  🙏                                            Aapka din mangalmay ho! 🌹