Bhartiye sena ke jawan - indian army

Radhe Radhe doston!

Rakhi ki Diary mein aapka swagat hai!

Aaj main lekar jaungi aapko ek ese safar per jisme hum baat karenge un veer senaniyon ki jo apni jaan ki parwah kiye bina, sirf ek tirange ke liye sab kuch luta dete hain. Jo muskurate hue goliyan khate hain, sirf is liye ki hum apne ghar mein chain ki neend so sakein. Jo har din maut se ladte hain, taaki hamara kal surakshit rahe.

.

Indian Army — Ek Junoon, Ek Samarpan-

Jab hum sab raat ko aaram se so rahe hote hain, tab koi jawan barf mein apna tanman jhonk raha hota hai.

Jab hum naye saal ki party mein dance karte hain, tab koi jawan border par apni nazre gadaye khada hota hai.

Aur jab hum family ke saath picnic bana rahe hote hain, tab koi jawan sirf ek photo dekhkar apne ghar ki yaad mita raha hota hai.                                                                    Unki zindagi balidaano se likhi jaati hai.

Tyag — Har Pal Ek Nayi Kasauti-

Jawan apni jawani tak desh ke naam kar deta hai.                                                        Shaadi ke sapne, maa ke haath ka khana, bachpan ke dost — sab kuch ek vardi ke    liye chhod deta hai.

Unka ghar unki post hoti hai. Unka festival duty hoti hai.                                                     Wo bina shikayat ke sirf ek kaam karta     hai — desh ki raksha.

Aur jab zarurat padti hai, wo muskurate hue apni jaan tak de dete hain.                          Kahi veer jawan shaheed hote hain toh unka antim yatra tirange mein hota hai.

Wo toh bas ek hi vasiyat chhodte hain — "Maa, ro mat… maine apna farz nibhaya hai."

Watan se pyar — Har Saans Mein Watan-

Deshbhakti unke liye ek shabd nahi, ek saans hai.                                                        Unka pyaar bina shabd ke hota hai, sirf action mein dikhai deta hai.

Na social media post, na koi headline — sirf ek sankalp hota hai.                                    "Main hoon, isliye desh surakshit hai."

Aur sabse badi baat — wo kisi religion, caste, ya language se upar hota hai.                    Unka dharm sirf ek hota hai — "Hindustan."

Zindagi Aur Maut Ke Beech Ki Patli  Lakeer-

Kahi border par unki neend kabhi puri nahi hoti, kahi jungalon mein jaan ka khatra hota hai,

Kahi par barfeela toofan, kahi atankwadi hamla.

Fir bhi wo kabhi ghabrate nahi.                 Unki training hi aisi hoti hai —

Jawano ke karz tale tabi hamari khuahiyan-

Aur hum? Hum aksar bhool jaate hain ki humari ek ek saans un jawano ke karz mein hai.

Hamare bachpan, hamare sapne, hamari azadi — unke khoon se likhi gayi kahani hai.

Indian Army ke Parivaar — gumnaam heros-

Sirf jawan nahi, unke parivaar bhi veero ki kahani ka hissa hote hain.

Jab koi jawan border par hota hai, uski maa har phone call se pehle dua karti hai.

Uski patni har darwaze ki aahat se ghabra jaati hai.                                                          Uska bachcha har baar kehta hai – “Papa  kab aayenge?”

Aur jab kabhi woh laut kar nahi aate, toh ye parivaar bas ek photo, ek yaad aur ek tiranga sambhal ke rakh lete hain.

Wo rote hain, lekin garv ke saath.

Fauj Sirf Ladai Nahi Hoti — Insaniyat Ki Misaal Hai

Aapne dekha hoga, jab kahin natural calamity aati hai, sabse pehle Indian Army pahunchti hai.

Flood ho, earthquake ho, ya pandemic — fauj bina bhedbhaav ke madad karti hai.

Wo sirf rakshak nahi, woh farishta hain.

Aur jab kabhi cricket match hota hai, ya Tiranga lahrata hai — hum sab chill karte hain —

“Indiaaaa... India!”

Par sach to yeh hai — India tab jeetta hai jab uska jawan safe hota hai.

Salam hai esi Indian Army — Har Dil Se-

Aaj bhi jab kisi parade mein uniform mein march karta hua jawan dikhta hai,

Dil se ek hi awaz nikalti hai —

“Salute hai tumhein, faujiyo!”

Wo sirf border ke soldier nahi hote, wo humare sapno ke rakshak hote hain.

Unke wajah se hum jee paate hain, muskura paate hain, khwab dekh paate hain.

Aur unke liye hum kuch bhi nahi kar pate, siwaye ek shabd ke —"Dhanyavaad."

Ek pyari si shayari desh ke veeron ke naam- 

Sarhad ki rait pe jo naam apna likh jata   hai,                                                                    Woh har tufaan ke samne chattan ban  jata hai.

Maangta wo kuch nahi, aur nyochhawar   sab kar jata hai,                                             Woh sipahi hi hota hai, jo desh ke liye mar   jata hai.

Na koi shikwa, na koi gila karta hai,            Bas maa ke pairon ko choomkar chup-chap nikalta hai.

Wardi uski pahchan hai, tiranga uska maan hai,                                                                Zindagi ho ya maut — dono mein uski Shaan hai."

 🪖 Meri Salah:

Hum aksar deshbhakti ko sirf 26 January aur 15 August tak hi seemit kar dete hain, lekin jo jawaan roz apni jaan hatheli par rakkar hamari hifazat karte hain, unke liye hamari deshbhakti bhi rozmarra ki zindagi ka hissa honi chahiye.

👉 1. Sammaan shabdon se nahi, vyavhaar se dikhta hai:-

Jab bhi kisi sainik se milen — chahe wo retired ho ya duty par — unhe ek muskaan, ek dhanyavaad aur ek sammaan bhari nazar se dekhen. Ye chhote ishaare unke liye bahut maayne rakhte hain.

👉 2. Shaheedon ko sirf yaad na karein, unke parivaron ka bhi saath dein:-

Yadi aapke aas-paas koi shaheed sainik ka parivaar hai, to unse judiyega. Unke tyohaar, mushkilon, aur aam dino mein bhi unka saath dijiye. Wo akele nahi hain — hum sab unke parivaar hain.

👉 3. Social media par nahi, dil se karein samarthan:-

Sirf "Jai Hind" ya “Salute to Indian Army” likhne se baat poori nahi hoti. Kuch chhoti-chhoti cheezein kar sakte hain —

Sainikon ke liye blood donation camps   mein hissa lena,                                          Sainik bachchon ki padhai ke liye NGOs ko support karna,

Ya kam se kam unhe online galat tareeke se troll karne walon ka virodh karna.

👉 4. Apne bachche ko sainikon ki kahaniyaan sunaiye:-

Unhe filmon se nahi, asal zindagi ke hero se prerna dijiye. Jab agli peedhi fauji ki vardi ko sirf naukri nahi, ek seva maanegi — tabhi asli badlaav aayega.

👉 5. Apne desh se pyaar kariye, kyunki wahi to unke liye sab kuch hai:-

Swachhata, imaandari, aur zimmedaari ke chhote-chhote kaam bhi ek tareeke se hamare sainikon ka saath hain. Jab hum apne desh ko behtar banaate hain, tab hi unki qurbaniyon ka aadar hota hai.

"Agar aap bhi apne dil mein ek sipahi ke liye sammaan rakhte ho, to apne jazbaat 

comments me zaroor likhiye — aapke shabdon ka ek ek harf unke liye ek salute hoga." 🇮🇳✨

Dhanyawad!

Radhe Radhe!  🙏                                         Aapka din mangalmay ho! 🌹