Hindi Cinema Ka Safar-Yaadon Se Bhara Har Ek Frame

Radhe Radhe doston!

Rakhi ki Diary mein aapka swagat hai!

Aaj main lekar chalti hoon aapko ek aise safar par, jo sirf filmon ka nahi… ehsaason ka hai. 

Hindi cinema se jude ehsaas-

Bachpan ke woh din, jab ek film dekh lena bhi ek celebration hota tha.

Jab Sunday ki subah Doordarshan par aati purani filmein, poore ghar ka mahaul badal deti thi.

Jab maa nashta banate hue awaaz lagati thi – “Film shuru ho gayi!”, aur hum bhaag kar TV ke saamne ja baithte the.

Jab papa ke favorite dialogues hum sabko yaad ho jaate the, aur ek gana sun kar puri kahani yaad aa jaati thi.

Hindi cinema ke purane daur ki  woh masoom filmein… unmein ek alag hi khushbooti thi. Aaj bhi jab woh geet bajte hain na, to lagta hai jaise dil kisi purani gali se ho kar aa gaya ho.

Aaj ke iss post mein, main baat karungi Hindi cinema ke un pyaare palon ki… jinmein humne sirf kahani nahi dekhi, balki apna jeevan mehsoos kiya. 

Film ke parde par chalti woh kahaniyaan, jaise hum sabke dil ki awaaz ban jaati thi.

To chaliye... aaiye mere saath, chalte hain ek baar phir uss waqt mein — jahan hero sirf ladta nahi tha, mohabbat bhi karta tha… 

jahan heroine sirf sundar nahi hoti thi, par sanskaaron ka roop bhi hoti thi. 

aur jahan cinema, cinema nahi, ek mehsoos hota tha.

Hindi Cinema – Yaadon Ka Safar-

Cinema... sirf ek kala nahi hai, ek jazba hai. Ek aisi duniya jahan hum apne sapne dekhte hain, apne dard bhulate hain, kabhi haste hain, kabhi ro padte hain. Par mere liye 

Hindi cinema ek zariya tha apne bachpan se judne ka, apne ghar ke uss kone se jahan TV par aati thi wo purani filmon ki roshni, maa ke haathon ka khana aur papa ki muskaan.

Lekin chalo aaj main tumhe le chalu ek safar par... jahan se Hindi cinema ki kahani shuru hui thi.



1913 – Ek Sapne Ka Janm-

Hindi cinema ki pehli film thi Raja Harishchandra, jise Dadasaheb Phalke ne banaya tha. Silent film thi. Bina dialogues, bina shabdon ke. Par emotions bolte the, 

aankhon se. Us waqt log theatre mein jaakar cinema dekhte the jaise kisi jadui duniya mein ghus gaye ho. Black and white tasveerein bhi dil mein rang bhar deti thi.

Yeh Hindi cinema ka janm tha – ek nayi duniya ka aaghaz.





30s aur 40s – Aawazon ka Safar-

1931 mein aayi Alam Ara, jo pehli bolti film thi. Aur tab se Hindi cinema mein awaaz aa gayi — dialogues, gaaney, jazbaat sab kuch zinda ho gaya. K. L. Saigal jaise kalakaron ne is daur ko chhoo liya. Filmon mein deshbhakti bhi thi, pyaar bhi, aur dard bhi.

Is daur mein cinema sirf manoranjan nahi, ek andolan ban gaya tha.


50s – Golden Era of Hindi Cinema-

Mujhe agar kisi daur ko sunehra daur kehna ho, to woh 1950s hi hoga. Raj Kapoor, Guru Dutt, Dev Anand jaise naam sirf hero nahi, ek jazba the. Filmon mein kahani hoti thi, geet hote the, aur sabse khaas — dil se dil tak pahunchne wali baat hoti thi.

"Awara", "Pyaasa", "Kaagaz ke Phool" — aisi filmein thi jise sirf dekha nahi jaata tha, mehsoos kiya jaata tha.


60s – Rang, Romance aur Melody-

Yeh daur le aaya aur zyada romance aur rangon ka jadoo. Black & white se color films mein badlav hone laga. Shammi Kapoor, Saira Bano, Meena Kumari, Dharmendra jaise stars screen par ek alag hi chamak le aaye.
Geeton mein rooh hoti thi. Mohammed Rafi, Lata Mangeshkar, Mukesh jaise awaazon ne dil jeet liya.

Filmein sapno jaise lagti thi — lekin unmein zindagi ke sach bhi hote the.



70s – Angry Young Man aur Badalte Jazbaat-

Jab duniya badal rahi thi, Hindi cinema ne bhi apna roop badla. Amitabh Bachchan jaise actors aaye jinhone aam aadmi ka dard screen par dikhaya. "Zanjeer", "Deewaar", "Sholay" — ye sirf filmein nahi thi, ek pura culture ban gayi.

Is daur mein massy cinema ka bol-bala tha. Action, drama, emotion — sab kuch tha. Filmein sirf dekhi nahi jaati thi, jeeti jaati thi.




80s – Thoda sa Rukna, Thoda Gumnaam Safar-

80s ka daur thoda mixed raha. Kuch filmein bahut dil ko chhoo gayi jaise "Masoom", "Sparsh", "Ardh Satya". Aur doosri taraf commercial films ne bhi apna raj kiya. Mithun, Anil Kapoor, Rekha, Sridevi, Hema Malini jese kalakar chhaye rahe.

Yeh ek aisa waqt tha jab Hindi cinema apni pehchaan ko sambhal raha tha.


Aur Phir Aaye 90s – Mera Apna Cinema-

Mujhe agar kisi daur se sabse zyada pyaar hai, to wo hai 90s ka zamana hai. Yeh wahi waqt tha jab main chhoti thi. TV par “Dilwale Dulhania Le Jayenge”, “Hum Aapke Hain Koun”, “Kuch Kuch Hota Hai” dekhte hue pal-be-pal jee leti thi.

Shah Rukh Khan, Salman Khan, Aamir Khan, Kajol, Madhuri Dixit, Juhi Chawala – unki muskaan mein, unke pyaar mein, unke gusse mein — sab kuch asli lagta tha.

Gaanon ka magic aisa tha ki "Pehla Nasha" sunte hi aaj bhi dil pehla pyaar mehsoos karta hai.
Yeh daur sirf filmon ka nahi, yaadon ka tha.

Aaj ke Cinema se Mera Rishta-

Main maanti hoon ki har daur ka apna rang hota hai, apni baat hoti hai. Lekin aajkal ki filmon mein woh rooh, woh gehraai kam mehsoos hoti hai. Kahaniya bhi fast hain, jazbaat bhi. Shayad isliye mera dil purane daur mein hi basa rehta hai.

90s ka cinema mera apna tha — slow tha, lekin sachcha tha.

Mujhe Cinema Ne Seekh Di Jeene Ki Ada-

Cinema ne sikhaya ki zindagi sirf jeene ka naam nahi — mehsoos karne ka bhi hai. Ek achhi film kabhi sirf 3 ghante ki kahani nahi hoti — wo ek aaina hoti hai jisme hum apne aap ko dekhte hain.

Aur agar koi mujhse pooche ki Hindi cinema mere liye kya hai?
To main kahungi:

> "Wo mere bachpan ka sathi hai,  
Jo kabhi Hansata hai, kabhi rulata hai —

Par har baar ek nayi roshni de jaata hai...


Kahani Abhi Baki Hai-

Hindi cinema ka safar kabhi rukha nahi hai. Har naye kalakar, har naye director ke saath naye jazbaat judte hain. Shayad kal fir koi film aisi aaye jo meri man ko chhoo le.

Par mere liye Hindi cinema ka sabse khoobsurat hissa hamesha wahi rahega — jahan kahani dil se likhi jaati thi, aur dard aankhon mein dikhai deta tha.


Ek pyari si shayari Hindi Senema ke naam-

Bachpan ki yaadon ki ek gahri si lakeer hai,

Cinema ke parde pe zindagi ki tasveer hai.

Kabhi Raja-Rani ka pyaar dekha, kabhi maa ke aansu,

Kabhi dosti mein chhupi thi jazbaaton ki khushboo.

70s ka jadoo tha, rangon ka tyohar tha,

Amitabh ka gussa tha, aur Madhubala ka pyaar tha...

90s mein mohabbat ke nagme gaati thi har ek film,

Her kahani me jud jaate the do dil.

Badla hai daur, par jazba wahi hai,

Cinema ke har daur mein ek kahani nayi hai.

Yeh sirf film nahi, hamari yaadon ka samaan hai,

Hindi cinema ko dil se mera salaam hai... ❤️

      

🎬 Meri Salah:

 

Cinema sirf manoranjan ka zariya nahi, ek samaj ka darpan hai.

Isliye achhi filmein sirf dekhiye nahi, unse seekhiye bhi.

Purani filmon ka jazba, sanskaar aur kahaniyon ka gehraai humari virasat hai.

Apne bachchon ko bhi un filmon se milwaaiye jahan mohabbat mein maryada thi,

dosti mein wafadari thi aur har kahani mein ek seekh chhupi hoti thi.

Kyunki jab hum apne cinema ki asli pehchaan samajhte hain,

tabhi hum apne sanskaar aur virasat se jude rehte hain. ❤️

Aap batayiye, aapka favourite daur kaunsa hai?

Kya aap bhi mere jaise purani filmon mein khud ko dhoondhte ho?

Aapke liye kaunsi film ya kaunsa pal sabse yaadgaar raha hai Hindi cinema se?

Comment mein zarur likhiye… aapki yaadon ko padkar dil ko sukoon milega ❤️🎥”

Dhanyawad!

Radhe Radhe! 🙏  

Aapka din mangalmay ho🌹