Shaadi ke baad ladkiyon ki asli zindagi

Radhe Radhe doston!

Rakhi ki diary me aapka swagat hai!

Aaj hum baat karenge ek aisi kahani ki... jo sirf ek rishta nahi, jeevan bhar ka saath hoti hai — Shaadi.

Shaadi… ek sapna bhi hai, ek chunauti bhi. Ek nayi shuruaat bhi hai, aur kabhi-kabhi apne aap se doori bhi. shaadi ke baad zindagi kaise pal me badal jati hai.



Shaadi ke Sapne vs. Haqeeqat-

Bachpan se ek sapna dekha hota  hai… ek din dulhan banungi. Lal joda pehnungi, sab mujhe dekhenge. Ek rajkumar aayega, haath pakad kar naye ghar le jaayega… jahan sirf pyaar hoga, swarg sa sundar ek ghar hoga.

Lekin shaadi ke baad samjha – ghar sirf eent-patthar se nahi, sahanubhuti se banta hai.

Rajkumar bhi insaan hota hai – kabhi pyaara, to kabhi gussel.
Aur ghar swarg jaisa tabhi hota hai jab dono milkar use sajate hain — sirf sajawat se nahi, samajh se.
Shaadi ka sapna jitna sundar tha, haqeeqat utni gehri thi.



👣 Apne pan ko dhoondhna ek naye ghar mein-

Apne ghar se nikal kar jab ek ladki kisi naye ghar mein kadam rakhti hai, to sirf jagah nahi badalti — poori duniya badal jaati hai.

Wahan log naye hote hain, reet-rivaaz naye hote hain, aur har kisi ki ummeed alag hoti hai.
Par sabse mushkil hota hai – apne aap ko wahan dhoondhna.
Apna ek kone ka kamra, ek pyala chai, ek awaaz jo bina kahe samajh jaaye… sab kuch wapas se paana padta hai.

Aur jab tak ek aurat naye ghar mein apni pehchaan bana leti hai, tab tak uske aansuon ki kitaabein sirf uske dil mein hi padhi jaati hain.aur ye sab kabhi kabhi use shaadi ke baad depression ki or le jaata hai.


💫 ladkiyon ka struggle shaadi ke baad-

Shaadi mein muskurahatein hoti hain, par unke peeche samaaj ke anek rang chhupe hote hain.

“Tum bahu ho, beti nahi...”

“Ye kaam tumhara hai…”

“Log kya kahenge…”

Sir per pallu lo....

Ghunghat me raha karo...

Tum bahu ho....

Kabhi ladki apna career chhod deti hai, kabhi apne pasand ke kapde, kabhi apni pasand cheeze to kabhi apni pasand se rahna. Aur ye sab isliye, kyunki usne khush rehne ka sapna dekha tha.

Par kya kabhi kisi ne usse poocha – “Tum khush ho?”

Shaadi sirf do logon ka rishta nahi hoti…

Woh do parivaron ke beech samajh ka pul hoti hai — jo kabhi kabhi sirf ek hi taraf se banaya jaata hai.

🌺 shaadi ke baad emotional changes-

Wo subah uthti hai sabse pehle…

Wo poore ghar ka dhyan rakhti hai, par apne dil ki awaaz kab sunti hai?

Shaadi ke baad har aurat ek jung ladti hai — kabhi dusron se to kabhi khud se hi.

Uski muskaan mein sabr hota hai, uske khamoshi mein kahani hoti hai.

Wo maa bhi banti hai, beti bhi rehti hai, biwi bhi hoti hai, aur kabhi kabhi apni hi dushman bhi.
Aur phir bhi… sab kuch sehkar kehti hai —

“Main theek hoon…”

🕊 Shaadi se seekhi kuch baatein – jo sirf samay hi sikhata hai-

Shaadi koi kitaab nahi hoti jise ek baar padho aur sab samajh aa jaaye.

Ye ek aisi journey hai jahan har din ek nayi seekh  milti hai:
Pyaar sirf shabdon se nahi, samay dene se hota hai.
Galtiyan dono se hoti hain — maafi bhi dono ko mangni chahiye.

Shaadi mein sab kuch paana nahi hota… kabhi- kabhi khud ko bhi khona padta hai.
Shaadi ne sikhaya — "khush rehne ke liye bas ek insaan ka samajhna kaafi hota hai.




📖 Jab shaadi sirf rishte nahi, seekh ban jaaye-

Ek ladki ka man kabhi kabhi kahta hai –
“Kaash meri kahani bhi kisi film jaisi hoti…”

Par phir ek din woh samajh jaati hai —
Uske aansuon mein bhi ek kahani chhupi hai…

Aur har kahani ki happy ending  nahi hoti, balki real life lesson bhi hoti hai.

Shaadi sirf jashn nahi, ek imtihaan bhi hota hai.

Aur us imtihaan mein jeetne ke liye sirf pyaar nahi, samajh, vishwas, aur sahas chahiye.


Jab ek ladki apna ghar chhodti hai, to vo sirf address nahi badalti… vo khud ko naye andaaz mein jeena seekhti hai.

Aur yeh sab sirf kahani nahi hai, yeh kai ladkiyon ki zindagi ki sachchai hai… jo chup reh kar bhi sab kuch seh jaati hain.

Ek shayari shaadi ke naam- 

Shaadi ek jashn hai ya uljhi si paheli  

Muskaan ke peeche ka dard kaise kahun saheli

Lal joda, mehendi, doli ka sapna,

Par har sapne mein chhupa hota koi apna

Ek naya ghar, ek nayi reet,

Dil mein umeed, aankhon mein preet.

Kabhi muskaan, kabhi aansuyon ka jahan,

Kabhi apne pan ki chhoti si muskan ki talaash.

Bahu kehkar sab kuch badal jata hai,

Dil to wahi rahta hai, bas roop naya mil jata hai.

Pallu, maryada, har kadam par bandhan,

Phir bhi ek aurat samarpit karti hai apna  tan man.

Shaadi sirf bandhan nahi, samajh ka ek raag hai,

Do dilon ka milan, do sanskritiyon ka bhaag hai.

Agar pyaar ho, to har dard bhi geet ban jata hai,

Aur agar na ho to kabhi kabhi swarg bhi nark ban jata hai.

Meri Salah:

Ladki sirf bahu nahi, insaan bhi hoti hai. Uske jazbaat ko samjho, uske sapne poochho.

Koshish sirf ek taraf se na ho. Shadi ke rishte mein do log hote hain, to koshish bhi dono ki honi chahiye.

Koi bhi insaan ya rishta perfect nahi hota.  samay do, khud ko bhi samjhao — sab kuch waqt ke saath behtar ho jaata hai.

Shaadi mein izzat, space aur prem — ye teeno hi barabari ki ahmiyat rakhte hain.  Inmein se koi ek bhi chhoot gaya to rishte mein khaali-pan aa jayega or rishta toot kar bikhar jayega.

Kisi aurat ki muskaan ke peeche ka struggle samjho, uski muskaan ke liye tumhara ek shabd bhi kaafi ho sakta hai.

Shaadi ka matlab koi bandhan nahi, ek saanjha jeevan hai.

Agar dono saath chalna seekh lein, to har musibat chhoti lagti hai, aur har pal ek geet ban jaata hai.

Kya aap bhi apne shaadi ke safar mein kuchh aisa mehsus kar chuke hain?

 Kya aapko bhi lagta hai ki shaadi sirf ek rishta nahi, ek seekh hai?

 Aapki sabse badi samajh kya rahi shaadi ke baad?


Comment mein jarur likhiye… kyunki ho sakta hai aapki baat kisi aur ke liye hausla ban jaaye. Mujhe aapke comment ka intezar rahega.

Dhanyawad!

Radhe Radhe! 🙏  

Aapka din mangalmay ho🌹